Isua thihna leh Newton’s law

 Newton's third law: 

For every action, there is an equal and opposite reaction.

 

Isua khan kraws a thih kha a phu reng em?

A hnuaia Bible chang tarlante hian a sawi fiah awm e.

1 Petera 2:22-

Ani chuan thil sual eng mah a ti lo va, a kâah bumna thu a chhuak hek lo. 23Hau a nih pawhin a hau lêt lo va, a tuar laiin a vau lêt hek lo, dik taka rorêl ṭhîntu hnênah chuan a inkawltîr zâwk a ni.

2 Korinth 5:21-

Ama zârah Pathian ṭhatna kan lo chan ve theih nân, sual rêng rêng hre lo chu, keimahni avângin Pathianin sualah a siam a ni.

Hebrai 4:15-

Kan Puithiam lalber neih hi kan chak lohnate min hriatpui pha lo a ni lo va, keimahni ang bawka kawng tinrênga thlêmna tâwk tawh, sual si lo chu a ni.

1 Johana 3:5-

Ani chu sualte la bo tûrin a lo lang a, amahah chuan sual a awm lo tih in hria e.

Sual avanga kraws a thih kha a phu miah lo, mahse kan sual ( ka sual, khawvel sual) a phurh miau avangin kan sualna hi thihna khawp hial a ni miau si a. Keichu thi tlak ka ni a, chatuan hremhmuna tla tur ka ni mahse Ani chuan sualna a nei lo. A phu vang ni miah lovin, kan tawrh ai a tuar a, thi khawp hialin thu a zawm a nih kha.

Chumi tluk zet chuan a tir a Newton’s law ka tarlan ang khian, thiltih reng reng a tlukpui leh letling chiah chu he kan chenna khawvelah hian dan angin a thleng ṭhin. Isua thihna avangin kan nung a, sualna nei lo khenbeh a nih rual khan misual hi chhuahzalen a fel a puan ka lo ni, Pathian mit a thi tawh hian thiltihtheihna ka chang a, sualna nei lo felna kha ka sual hle chung hian ka felna a ruatsak ka lo ni ta.

 Nang leh kei hi, Misual kan ni a, Pathian lak aṭanga thi tawh, mi bawlhlawh kan ni. Mahse Isua felna leh nihnate kha kan phu vang ni miahlovin kan hnenah a thlawna, ring apiangten an dawn atan kan chan a lo ni ve ta. Thihna ruala kan thih ve avangin, a thawhlehnaah pawh a ruala kaihthawh kan ni.  

JOHANA 3:16

Pathianin khawvêl a hmangaih êm êm a; tichuan, a Fapa mal neih chhun a pe a, amah ring tawh phawt chu an boral lohva, chatuan nun an neih zâwk nân.

2 Korinth 5:21-

Ama zârah Pathian ṭhatna kan lo chan ve theih nân, sual rêng rêng hre lo chu, keimahni avângin Pathianin sualah a siam a ni.

Ephesi 2: 8-9 

Rinna avânga khawngaihnaa chhandam in ni, chu chu in thawh chhuah a ni lo, Pathian thilpêk a ni.

ROM 6:23 

Sual man chu thihna a ni si a; Pathian thilthlâwnpêk erawh chu kan Lalpa Krista Isuaah chuan chatuan nunna a ni.

A thlawna kan dawn, phu lo te chunga hmangaihna avanga nunna Isua zara kan nei hi kan va han vannei tak em. Mi thar, thilsiam thar kan lo ni ta a, thiltihtheihna leh thuneihna nasa tak nei kan lo ni leh thei ta. Thiltih leh thilpeka kan hnehbân theih ngai loh Pathian hian chu dinhmun ropui tak chu a fapa Isua kaltlangin a rawn thawk a. Thisen thiltihtheihna , thawhlehna thiltihtheihna ropui taka thawktu Thlarau Thianghlim chu kan chhungah a cheng ta a; kan thlarau hian chu Thlarau Thianghlim nen a inpawl chu chakin a rûm vawng vawng ṭhin.

Kan tisanain kan thlarau duhzawng a hlamchhiah chang hian kan nun a ngui a, zawhna tam tak kan neih phah ṭhin. Malsawmna, thuneihna leh thiltihtheihna tam tak kan dawng tawh mek a, rinna a dawn belh tur van khian a khawl ṭeuh bawk. Hawh u, ram ṭha lehzual chakin i thawk sauh sauh ang u.

♥️