Kum engzat nge a nih ka hre thei tawh lo-
Ni khat lek pawh i hmangaih tel lova i nun khawhar zia kha ngaihtuah la, a nih loh pawhin hmangaihtu che nei lova i inhriat vanga i nun a ruakzia kha han ngaihtuah la.. Ni za tam tak, thla tam tak, kum tam tak, hmangaihtu dik ngaihtuah lova, Pathian hmangaihna ka uiresan khan ka nun a hrehawm em em a ni tih min hriatpui thei ang. Sual ata tal chhuah tumna chang pawh hre lovin sual chuan chu khur thuk chu ka awmna hmun tur emaw min tih tir a.. Tal chhuaha, tanpuina ban pawh vuan ngam lovin min awm tir a ni. Nimahsela, vawiin hian chu kawl rit ata chu chhuah ka ni tih ka in hria e..
A malsawmna ka dawn zara ka lo chapopui ve, ka nihna emaw ka tih te'ngte kha Ani min theihngilh tirtu a nih avangin ka tan chuan a hnawk em em a ni. Ka lo thanlenpui sual tam tak min hriatchhuah tir a; A hnena tawngtaia, ngaihdam dil tul ni a ka hriat loh tam tak hi min hmuhtir a, ka tenawmzia ka hriat rualin A hmangaihna daltu atan an tlin lohzia min la hrilh cheu a ni.
Lalpa, ka va han lawm em.
Chhungkaw neinung tak atangin chhuak lo mah ila,
Nangmah hretu chhungkua min pe a.
Thiantha chu ngah lo mah ila,
thian nih hlutna min hriattir thintu min pe a.
Bel chhia leh ruak ngawt ka nih lai pawhin
I hmangaihna in min kalsan lova,
Zawn che tulna ka hriat loh laiin,
Nangmah zawkin min rawn tâwk leh a.
Lawmthu sawi nachang ka hriat loh khawp a
tlaia min siamna thin thil tam tak avangin ka lawm bawk a ni.
Vantirhkoh min vengtu min pe,
i mit naute ang maiin dimdawi takin min enkawl bawk a.
Lawmna tur ka va han ngah em,
hnaih zel thei tur che in min pui ang che.
Lalpa, ka lawm e.
