 |
| Photo credit: RICKY VANLALPEKA |
Ka han ngaihtuah let leh chang pawh hian hmangaihnaah ka tlan lut ta mai tih ka in hriat pawh khan awm lo tihna kha ka nei mang meuh lo, a chhan ber chu ka mi hmangaih khan ka hmangaihna neih kha a tum ber kha a ni thin reng a, hun min siam a, hun min pekahte hlah lovin ka tan a inpe thei em em a, eitur min siam a, min ti nui a, pum rawl thum khawpa min ti nui theitu awmchhun kha a la ni reng bawk…
Rang takin hmangaihnaah chuan ka lut a, ka inchhir ngai reng reng
lo. A tan ka inhuamin, ka theih apiang kha chu ka tihsak ve thin. Chhungkaw
dinhmun te a inang lova, a hman hunah ka hman lova, a hnenah ka awm tam thei
lova, mahse remchang kan dap ve ruai thin.
Ani nen a kan in hmangaihna kha tunlai tleirawlte inngaihzawn
dan tlangpui nen han khaikhin dawn thin ila chuan, hmanlai kan pi leh pute hunlai
kha a ang zawk mah awm e.
Inchhawng chung sang atangin bag ka uaithlak tir a, zanlaiah
eitur chutah chuan a han dah a, note a hnutchhiah tel bawka, min hmangaih thu
leh tui taka ei tur te leh chhel taka engkim hmachhawn turin min chahna te a
ni. Ka han ngaihtuah let hian chungahte chuan lemchan engmah a awm bikin ka hre
lo, hmun leh hmunah, in pali panga karcheh lek ni mah ila, inmuh kha a har ve
hle thin a, concrete ban leh hunt e kha min dangtu an ni pawh hian ka hre lo,
mihring rilru zawk khan min daidang ni ber thin in ka hria.
Inhmuh kha kan thlahlel em em ringawt a, nitin khan inhmu lovin kan
awm kha hlauvin, dawr kal pah mai mai a han tei dun te kha kan tum tlat zel
thin. Rei lo te chhungin darker te chu a ral a, ni a ral, thla a ral a, kum
pawh ral leh mai tur khan ka ngai a mahsela rilru te hi a lo danglam thin a,
hun tawn mil zel leh kan chhehvela thil thlengte hian rilru hi a lo thlak ve
leh mai thin a. Hmangaihna,kan engkim ni thin a pawh kha, engmah lo maia tham
ral mai hmabakin kan inkar chu a chhe ta em em mai a nih tawh hi!
Hmangaihten min han kalsan hi chuan tha a thum a, chaw lem a har
em em a, tuisik pawh hian hrawk a ti na thei emaw tih mai turin, thawk pah hian
awm te hi a hik chuai chuai mai thin ni ber hian ka hria. Nitin, engtik lai
pawhin rilrua awmchhun chu, anin min kalsan tak avanga huatna ai chuan, kan in
hmangaih thin laia kan hlim dun zia ngaihtuah kha a ni, amah ngaihtuah lovin ni
khat ka ban tlang vedawn tawh a maw ka inih tum pawh hian, “ EHE! Vawiin chu
amah ngaihtuah lovin ka awm ve thei mawle” ka han tia, amah bawk chu ka
ngaihtuah chhunzawm leh thin.
Midang leh thildang reng reng hi a dinhmun luah pha an awm lova,
a aiawh tur zawng pawh hian ka phar buai peih tawh lo, nitinin ka la nat pui
reng zawng a nih hi!
Ti hian zanin chu ka ngaihtuah taa, hmangaihnaah hian rang
takin zuan luh mai ka duh tawh lo.
Ani ka lo hmangaih mai ni khan in ngaihtuah chianna hun ka nei
lova, hmanhmawh takin hmangaihnaah khan ka zunag luta. Mahse ani chuan min han
kalsan ta a, rang taka hmangaihna rawn piang a khan, rang takin min kalsan leh
ta si lova. Muangchangin nitinin ka taksa nen hian min ei ral mek zawk a,
hmangaihnaah hian rang taka tlan luh mai ka duh tawh lo, muangchangin min
chhuahsan dawn tih ka hriat tawh avangin.
